Vuurseisoen in volle swang

0
305
Vuurseisoen

Vuurseisoen in volle swang. Op Donderdag, 23 Julie het die Mkhondo Nooddienste hulle hande behoorlik vol gehad met ’n beheerde brand en een wat deur kwaaddoeners gestig is.

Die rookwolke, wat die gevolg was van die beheerde brand op die hoek van Draad- en Olmesdahlstraat, was so dig dat motoriste nie die pad voor hulle kon sien nie en moes dus hulle spoed aanpas. Die vlamme was wel goed onder beheer gehou en alhoewel dit ’n ongerief vir motoriste en inwoners van die huise om die veld was, was dit beslis nodig.

’n Beheerde brand verminder die moontlikheid van ’n gevaarlike brand wat dalk deur kwaaddoeners gestig kan word op ’n latere stadium.

Terselfdertyd was daar ’n brand in en om die begraaf-plaas op die hoek van Theo Moche- en Mullerstraat, wat deur kwaaddoe-ners gestig is.  Die vlamme het hoog gebrand en het die heining van die begraafplaas beskadig.

Volgens ’n bekommerde inwoner van Piet Retief, was die areas om die heining ver-onderstel om skoon te wees sodat die vlamme nie by die heining kan uitkom nie. Indien daar ’n brand is, brand die beskermingslaag van die heining af. Dit sal dus op die onkoste van belastingbetalers vervang moet word, as gevolg van erge roes.

Om ’n onbeheerde brand te stig is baie onverantwoordelik. Dit kan lewens in gevaar stel en baie skade aanrig. Dit is strafbaar deur die gereg en jy kan ’n boete asook tronkstraf kry. Dink ’n bietjie voor jy doen.

Wees verantwoordelik!